Supershare.com

មុននេះ Sabay ធ្លាប់បានចុះផ្សាយពីតំណាងបេក្ខភាពបវរកញ្ញាវៀតណាមទៅប្រកួត បវរកញ្ញាចក្រវាលពិភពលោកនៅទីក្រុង មូស្គូ ប្រទេសរុស្ស៊ីម្ដងហើយ ថា មានដើមកំណើតនៅរាជធានីភ្នំពេញ។ ដោយឡែកថ្មីៗនេះ តាមរយៈបទសម្ភាសជាមួយសារព័ត៌មានសំឡេងសហរដ្ឋអាមេរិក VOA កញ្ញា Truong Thi May បាននិយាយថា នាងរីករាយដែលមានឈាមជ័រជាខ្មែរ និងវៀតណាម។

កញ្ញា Truong Thi May (រូបថត៖ vnmedia)

បវរកញ្ញាដែលមានឈ្មោះខ្មែរថា រស្មី បាននិយាយភាសាខ្មែរប៉ៃឡាំៗថា នាងបានបាត់បង់ឪពុកតាំងពីអាយុ ៦ ឆ្នាំមក។ តាំងពីពេលនោះមក នាងបានហែលឆ្លងទុក្ខលំបាករាប់មិនអស់។ ឆ្លើយនឹងសំណួររបស់អ្នកសម្ភាសថា តើកញ្ញានឹងធ្វើអ្វីប្រសិនបើជាប់ជាបវរកញ្ញាចក្រវាលពិភពលោក ២០១៣ ? ស្រីស្រស់វ័យ ២៥ ឆ្នាំរូបនេះ បានរំលឹកថា កញ្ញាធំធាត់ឡើងក្នុងចំណោមបងប្អូនខ្មែរកម្ពុជាក្រោមនៅខេត្ត Bach Lieu ហើយគ្រួសារកញ្ញាក៏ស្ថិតក្នុងជីវភាពដ៏លំបាកផងដែរ។ បើសិនជាកញ្ញាជាប់ជាជយលាភីនៃកម្មវិធីប្រកួតប្រជែងខាងលើ នាងនឹងជំរុញ និងលើកយកទុក្ខលំបាករបស់ស្ត្រីកម្ពុជា និងវៀតណាមឲ្យពិភពលោកបានដឹងបានឮ។ នាងនិយាយថា ៖ “ខ្ញុំយល់ពីអារម្មណ៍អ្នកជួបទុក្ខលំបាក ព្រោះគ្រួសារខ្ញុំក៏ធ្លាប់ឆ្លងកាត់បទពិសោធន៍នេះដែរ”។
អាន៖ ប្រទេសអាស៊ានណាខ្លះបញ្ជូនបវរកញ្ញាទៅចូលរួមប្រកួតបវរកញ្ញាចក្រវាលខ្លះ?

កញ្ញា Truong Thi May ក្នុងសំលៀកបំពាក់ប្រពៃណីខ្មែរ
(រូបថត៖ vnmedia)

កញ្ញា May ក៏បានសម្ដែងការសោកស្ដាយផងដែរដោយមិនអាចគ្រងសំលៀកបំពាក់ខ្មែរ ចូលរួមក្នុងកម្មវិធីខាងលើ ព្រោះបេក្ខភាពម្នាក់អាចស្លៀកសំលៀកបំពាក់បានតែបីប្រភេទប៉ុណ្ណោះ គឺទី ១ សំលៀកបំពាក់តំណាងប្រទេសចូលរួមប្រកួត ទី២ សំលៀកបំពាក់រាត្រីសមោសរ និងទី៣ ឈុតប៊ីគីនី៕

សូមមើលវីដេអូបទសម្ភាសជាមួយកញ្ញា May ខាងក្រោម៖