យ៉ាងណាតាមប្រភពពីក្រុមហ៊ុននាំចូលរថយន្តមែសឺដេស ស្របច្បាប់ប្រាប់ថា អតិថិជនកម្ពុជាកាន់តែច្រើនកំពុងងាកប្រើប្រាស់រថយន្តមែសឺដេសដែល ទិញពីក្រុមហ៊ុនស្របច្បាប់ និងដែលមានអាជ្ញាប័ណ្ណត្រឹមត្រូវពីរោងចក្រផលិត។
លោក ឃុន ចាន់ថា នាយកគ្រប់គ្រងទូទៅក្រុមហ៊ុន ហ៊ុងហ៊ាប ជាក្រុមហ៊ុនទទួលសិទ្ធិចែកចាយរថយន្តម៉ាកមែសឺដេសនៅលើទីផ្សារប្រទេស កម្ពុជា បានឲ្យដឹងនាសន្និសីទសារព័ត៌មានកាលពីរសៀលម្សិលមិញថា ការលក់ចេញរថយន្តម៉ាកមែសឺដេសពីក្រុមហ៊ុនរបស់លោក កំពុងមានការកើនឡើងពី ២០ ទៅ ៣០ ភាគរយជារៀងរាល់ឆ្នាំ។
ការលក់កើនឡើងនេះ លោកបញ្ជាក់ថា គឺដោយសារឥរិយាបថរបស់អតិថិជនកំពុងមានការផ្លាស់ប្តូរក្នុងការ ជ្រើសរើសរថយន្តប្រភេទមែសឺដេស ដែលនាំចូលដោយស្របច្បាប់ ខណៈកន្លងទៅលោកមើលឃើញថារថយន្តមែសឺដេសដែលអតិថិជនទិញប្រើប្រាស់ ច្រើនមានប្រភពមកពីឃ្លាំងលក់នានា។
“មុនឆ្នាំ ២០០៨ ភាគច្រើន រថយន្តប្រភេទមែសឺដេសដែលធ្វើចរាចរណ៍នៅលើដងផ្លូវ ច្រើនជារថយន្តដែលមានប្រភពមកពីឃ្លាំងលក់នានា ហើយភាគតិចណាស់ជារថយន្តចេញពីក្រុមហ៊ុន”។
លោកថា ការទិញរថយន្តពីក្រុមហ៊ុនដែលស្របច្បាប់ និងមានអាជ្ញាប័ណ្ណត្រឹមត្រូវ អតិថិជននឹងទទួលបានការធានាការប្រើប្រាស់ ការផ្តល់ការថែទាំនិងជួសជុលប្រកបដោយស្តង់ដា រួមជាមួយការទទួលបានអត្ថប្រយោជន៍ជាច្រើនទៀតក្រោយការទិញ ប្រើប្រាស់។
លោកទទួលស្គាល់ថា តម្លៃលក់រថយន្ត មែសឺដេសនៅក្រុមហ៊ុនមានតម្លៃខ្ពស់ជាងតម្លៃលក់នៅតាមឃ្លាំងមួយ ចំនួន ដែលធ្វើឲ្យអ្នកប្រើប្រាស់មួយចំនួនសម្រេចចិត្តខុសក្នុងការ ជ្រើសរើសរថយន្តមែសឺដេសមិនបានត្រឹមត្រូវ ដែលអាចនាំឲ្យខាតបង់លុយកាក់និងមិនធានាបានការប្រើប្រាស់យូរអង្វែង។
យ៉ាងណានាយកគ្រប់គ្រងរូបនេះបានអះអាងទៀតថា ចំណែកទីផ្សាររថយន្តមែសឺដេសដែលលក់ចេញពីក្រុមហ៊ុន កំពុងមានសន្ទុះកើនឡើង ហើយលោករំពឹងទុកថា ចំណែកទីផ្សារនឹងកើនឡើងថែមទៀត ដោយសារពលរដ្ឋកាន់តែមានការយល់ដឹងពីការជ្រើសរើសទិញរថយន្តមែសឺដេស ដែលនាំចូលស្របច្បាប់ និងមានការធានាពីរោងចក្រផលិតត្រឹមត្រូវ ដោយមិនផ្សងព្រេងទិញរថយន្តដែលមិនមានប្រភពច្បាស់លាស់ ដែលនាំឲ្យខាតបង់លុយកាក់ និងមិនផ្តល់សុវត្ថិភាពក្នុងការប្រើប្រាស់នោះទេ។
ក្នុងសន្និសីទកាលពីរសៀលម្សិលមិញនេះដែរ ក្រុមហ៊ុននេះក៏បានប្រកាសឈប់ទទួលការផ្តល់ការថែទាំជួសជុល និងការប្តូរគ្រឿងបន្លាស់ផ្សេងៗសម្រាប់ប្រភេទរថយន្តមែសឺដេស ដែលផលិតក្រោយឆ្នាំ ២០១៣ នេះ ដោយសារតែមើលឃើញរថយន្តទាំងនោះមិនមានបទដ្ឋានស្តង់ដារត្រឹមត្រូវ, គ្មានសុវត្ថិភាពក្នុងការបើកបរ និងមានលក្ខណៈបច្ចេកទេសខុសគ្នាច្រើនបើធៀបទៅនឹងរថយន្តដែលបាននាំ ចូលនិងដាក់លក់ដោយក្រុមហ៊ុន។
Link to: http://news.sabay.com.kh/articles/490042
No comments:
Post a Comment