Supershare.com

ដោយធុញថប់នឹងសំឡេងអ៊ូអរនៅក្នុងទីក្រុង ជួនកាលយើងក៏នឹកចង់ទៅសម្រាកនៅទីកន្លែងណាមួយដ៏ស្ងប់ស្ងាត់ ជាមួយនឹងធម្មជាតិ។ តំបន់ទេសចរណ៍ដែល Sabay នឹងបង្ហាញជូនប្រិយមិត្តនាចុងសប្ដាហ៍នេះ គឺពិតជាសក្ដិសមបំផុតចំពោះអ្នកដែលប្រាថ្នាចង់បន្ធូរអារម្មណ៍ ក្នុងបរិស្ថានធម្មជាតិដូច្នេះ នោះគឺរមណីយដ្ឋាន Lion Sands។

The Lion Sands គឺជាតំបន់អភិរក្សមានទីតាំងនៅតំបន់ Sabie Sand នៅអាហ្វ្រិកខាងត្បូង។ នៅទីនោះ ភ្ញៀវទេសចរសម្រាកកាយសប្បាយចិត្តជាមួយកន្លែងស្នាក់នៅយ៉ាងល្អ ប្រណិត ថែមទាំងមានឱកាសមើលឃើញសត្វព្រៃពិសេសៗជាច្រើនដែលរស់នៅតាម លក្ខខណ្ឌធម្មជាតិដូចជា តោ ដំរីទឹក និងសត្វកវែងជាដើម។

Lion Sands រួមមានផ្ទះសម្រាកចំនួន ៥ និងផ្ទះលើដើមឈើចំនួន ៣ សម្រាប់ឲ្យភ្ញៀវទេសចរជ្រើសរើសបានតាមតម្រូវការ ដែលផ្ទះនីមួយៗសុទ្ធតែផ្ដល់នូវបទពិសោធន៍ដ៏រីករាយតាមបែបផ្សេងៗ គ្នា។ ផ្ទះសម្រាកនីមួយៗមានបន្ទប់ធំទូលាយ ហើយទេសភាពស្អាតៗដែលគេអាចមើលឃើញពីផ្ទះទាំងនេះមានដូចជា ទិដ្ឋភាពពីទន្លេ Sabie និងឧទ្យានជាតិ Kruger។

សម្រាប់អ្នកដែលចូលចិត្តលក្ខណៈធម្មជាតិជាងនេះទៅទៀតនោះ ផ្ទះដើមឈើគឺពិតជាសក្ដិសម ជាមួយនឹងទិដ្ឋភាពថ្ងៃរះ ហើយនៅពេលយប់ក៏មិនមានភ្លើងអគ្គិសនីដែរ ដែលធ្វើឲ្យភ្ញៀវទេសចរមានអារម្មណ៍ធម្មជាតិ ១០០%តែម្ដង។

ក្រៅពីការសម្រាក និងដើរកម្សាន្តមើលសត្វព្រៃក្នុងតំបន់នេះ Lion Sands ក៏រួមមានសេវាកម្មល្អជាច្រើនទៀតផងដែរ ដូចជា សេវាកម្មស្ប៉ា ភោជនីយដ្ឋាន និងអាងហែលទឹកជាច្រើនទៀត។
ឥលូវនេះសូមទស្សនាទិដ្ឋភាពពិសេសៗបន្ថែមទៀតនៅរមណីយដ្ឋាន Lion Sands តែម្ដង ដើម្បីឲ្យដឹងច្បាស់ថាតំបន់ទេសចរណ៍មួយនេះមានសម្រស់ស្រស់ស្អាត ប៉ុណ្ណា៖