កម្មវិធីប្រកួតប្រជែងរូបថតនេះអនុញ្ញាតឲ្យអ្នកថតរូប មិនថាអាជីព ឬមិនអាជីព ដោយមិនប្រកាន់ថាខ្មែរ ឬបរទេសឡើយ អាចផ្ញើរូបថតរបស់ខ្លួនយ៉ាងច្រើនបំផុតបីសន្លឹក មកអង្គការតម្លាភាពកម្ពុជា ឲ្យបានមុនថ្ងៃទី១៥ ខែមិនា ឆ្នាំ២០១៤នេះ។
យោងតាមសេចក្ដីប្រកាសព័ត៌មានអំពីកម្មវិធីប្រកួតប្រជែងរូបថត របស់អង្គការតម្លាភាពកម្ពុជា អំពើពុករលួយបានប៉ះពាល់ទៅដល់ប្រជាពលរដ្ឋ ក្នុងការទទួលបានសេវាកម្មល្អទៅលើសុខភាព ការអប់រំ សេរីភាពក្នុងការបញ្ចេញមតិ សិទ្ធិក្នុងការបង្កើតសមាគម សិទ្ធិបោះឆ្នោត ឬសិទ្ធិទទួលបានការកាត់ក្ដីដោយយុត្តិធម៌។
ម្ល៉ោះហើយ លោក ប៉ូច ពិសាល អ្នកទទួលបន្ទុកកម្មវិធីប្រកួតប្រជែង រូបថត របស់អង្គការតម្លាភាពកម្ពុជា ឲ្យដឹងថា គោលបំណងនៃកម្មវិធីនេះ គឺដើម្បីបង្ហាញឲ្យឃើញថាតើអំពើពុករលួយជះឥទ្ធិពលយ៉ាងណាទៅលើ ជីវិតរស់នៅរបស់ប្រជាជន ក្នុងប្រទេសកម្ពុជា។
លោកបន្ថែមថា៖ “ការប្រកួតប្រជែងទាក់ទងនឹងអំពើពុករលួយនេះ អាចរួមចំណែកឲ្យមានការផ្លាស់ប្ដូរខ្លះ យ៉ាងហោចណាស់អាចធ្វើឲ្យប្រជាជនខ្មែរ ដែលចូលរួមបង្កើតឲ្យមានអំពើពុករលួយនេះ ដូចជាតាមរយៈការសូកលុយ បានយល់អ្វីទៅជាអំពើពុករលួយ”។
អ្នកទទួលបន្ទុកកម្មវិធីប្រកួតប្រជែងដដែលបន្ថែមទៀតថា ការប្រកួតរូបថតនេះ ក៏ដើម្បីជ្រើសរើសយករូបថតលេខមួយ មកធ្វើជាក្របទំព័ររបស់របាយការណ៍វាយតម្លៃទៅលើភាពខ្លាំង ភាពខ្សោយ និងឯករាជ្យភាពរបស់ស្ថាប័នរដ្ឋចំនួន១៣ មានចំណងជើងថា “ការវាយតម្លៃប្រព័ន្ធសុចរិតភាពជាតិ” ដែលអង្គការរបស់ខ្លួនបានធ្វើ និងគ្រោងចេញផ្សាយនៅចុងខែឧសភា ខាងមុខនេះដែរ។
បេក្ខជនដែលចាប់អារម្មណ៍នឹងកម្មវិធីប្រកួតប្រជែងរូបថតនេះ អាចផ្ញើរូបថតរបស់ខ្លួន មានទំហំ មិនលើស១មេហ្គាបៃ ស្ថិតក្នុង JPG format ជាមួយនឹងអត្ថបទពន្យល់ពីរូបថតនោះ មិនឲ្យលើសពី១៥០ពាក្យ មកកាន់ competition@ticambodia.org។ ជយលាភីទាំងអស់នឹងត្រូវប្រកាសនៅថ្ងៃទី៤ ខែមេសា ខាងមុខ ហើយស្នាដៃដែលជាប់ពានរង្វាន់នេះនឹងត្រូវពិព័រណ៍បង្ហាញជូន សាធារណៈបានទស្សនាដោយសេរី នៅថ្ងៃនោះផងដែរ។
ជយលាភីលេខមួយនឹងទទួលបានរង្វាន់ជាកាមេរ៉ាឌីជីថលមួយគ្រឿង ខណៈលេខពីរ និងលេខបីនឹងទទួលបានវគ្គបណ្ដុះបណ្ដាលជំនាញថតរូប។ ក្រៅពីនេះ ក៏នឹងមានជយលាភី៧រូបផ្សេងទៀត។
កន្លងមក អង្គការតម្លាភាពកម្ពុជាធ្លាប់បានរៀបចំការប្រកួតប្រជែងស្នាដៃរបស់ ប្រជាជនពលរដ្ឋខ្មែរម្ដងហើយ ដោយកាលនោះ ការប្រកួតប្រជែងគឺពីការសរសេរអត្ថបទទាក់ទងនឹងអំពើពុករលួយ។
លោក ផាក់ សៀងលី អ្នកយកព័ត៌មានរបស់កាសែតភ្នំពេញប៉ុស្តិ៍ ដែលបានជាប់ជយលាភីលេខ១ លើអត្ថបទទាក់ទងនឹងបទពិសោធន៍ផ្ទាល់ខ្លួនចំពោះអំពើពុករលួយ និងទទួលបានរង្វាន់កុំព្យូទ័រយួរដៃមួយគ្រឿង ក្នុងការប្រកួតឆ្នាំទៅ ឲ្យដឹងថា អំពើពុករលួយ គឺមានស្ទើរគ្រប់ទីកន្លែង គ្រាន់តែការប្រព្រឹត្តិនោះធំ ឬតូចប៉ុណ្ណោះ ហើយអំពើពុករលួយខ្លះក៏ចូលរួមបង្កើតឡើងដោយប្រជាជនតែម្ដង។
លោកថា៖ “គ្រាន់តែយើងយកលុយទៅសូកគេ គឺជាអំពើពុករលួយបាត់ទៅហើយ។ មនុស្សម្នាក់ៗចូលរួមប្រព្រឹត្តិអំពើពុករលួយដោយពុំដឹងខ្លួន។ ដើម្បីបំបាត់អំពើពុករលួយនេះ ខ្ញុំគិតថា គឺចាំបាច់ត្រូវផ្ដើមផ្លាស់ប្ដូរពីយើងម្នាក់ៗទៅ”។
លោក សុវណ្ណ ភីឡុង គ្រូបង្រៀនថតរូបនៅវិទ្យាស្ថានបារាំង និងជាអតីតអ្នកថតរូបឲ្យភ្នាក់ងារព័ត៌មានចិន Xinhua ឲ្យដឹងថា ថតរូបអាចរៀបរាប់ពីរឿងរ៉ាវបានច្រើន មិនមែនបានតែអត្ថបទនោះទេ។
គ្រូបង្រៀនថតរូបរូបនេះពន្យល់ថា៖ “រូបដែលយើងថត គឺអាចបង្ហាញន័យដោយផ្ទាល់ក៏បាន ឬដោយប្រយោលក៏បាន។ បើអត្ថន័យផ្ទាល់ យើងគ្រាន់តែដាក់លុយក្រោមតុ រួចថត គឺអាចបញ្ជាក់បានអំពីអំពើពុករលួយហើយ ប៉ុន្តែរូបភាពបែបនេះ គឺធម្មតាៗទេ។ រូបថតដែលល្អ គឺថតដោយគំនិតច្នៃប្រឌិត។ ខ្ញុំគិតថា ការថតទាក់ទងនឹងអំពើពុករលួយនេះ មិនស្រួលប៉ុន្មានទេ ទាមទាឲ្យមានការស្រមើស្រមៃច្រើន និងត្រូវសមស្របតាមស្ថានភាពសង្គមជាក់ស្ដែងផង។ ខ្ញុំឲ្យឧទាហរណ៍មួយ លោកគ្រូពេទ្យពាក់អាវ ដោយមានហោប៉ៅដេរមាត់ចុះក្រោម ដែលនេះមានន័យប្រយោលថា ហោប៉ៅដេរមាត់ចុះក្រោមអីចឹង ដាក់លុយមិនជាប់ទេ ដូច្នេះគេអាចគិតថាគ្មានអំពើពុករលួយកើតឡើងអីចឹងដែរ”។
លោក ភីឡុង សង្កេតឃើញថា បច្ចុប្បន្ននេះ យុវជនខ្មែរកាន់តែច្រើនឡើង ចាប់អារម្មណ៍នឹងការថតរូបគ្រាន់បើ ប៉ុន្តែលោកថា ការចូលចិត្តថតរូបគឺជារឿងល្អមួយ ប៉ុន្តែការចេះថតរូបឲ្យល្អទៀត គឺទើបជាជោគជ័យដ៏ពិតប្រាកដ។ ដើម្បីឈានទៅរកជោគជ័យនេះបាន អ្នករៀនថតរូបម្នាក់ៗគួរតែចេះមើលរូបគំនូរ ឬរូបថតរបស់អ្នកដទៃ ទើបគេអាចបើកគំនិតឆ្នៃប្រឌិតរបស់ខ្លួនបានកាន់តែប្រសើរ៕
Link to source: http://news.sabay.com.kh
No comments:
Post a Comment