Lewandowski (កណ្តាល) របស់ Dortmund ដណ្តើមបាល់ជាមួយ Mertesacker (ស្តាំ) និង Laurent Koscielny របស់ Arsenal អំឡុងការប្រកួត Champions League ពូល F របស់ពួកគេ។ AFP
Arsenal បានទទួលបរាជ័យជាលើកទី១របស់ពួកគេបើគិតចាប់តាំងថ្ងៃបើកឆាកនៃ យុទ្ធនាការ Premier League ខណៈដែលក្រុមជើងឯករងកាលពីឆ្នាំមុន Borussia Dortmund បានផ្តួលពួកគេក្នុងលទ្ធផល ២-១ នៅឯកីឡដ្ឋាន Emirates។
ខ្សែប្រយុទ្ធ Olivier Giroud បានតាមស្មើគ្រាប់បាល់បើកឆាករបស់ខ្សែបម្រើ Henrikh Mkhitaryan នៅមុនពេលខ្សែប្រយុទ្ធអន្តរជាតិប៉ូឡូញ Robert Lewandowski បានរកគ្រាប់បាល់ឈ្នះក្នុងការប្រកួតនេះ ប៉ុន្តែ រូបគេពិតជាមានសំណាងណាស់ក្នុងការមានវត្តមាននៅលើទីលាន ក្រោយពីបានឲ្យកែងទៅលើខ្សែការពារ Laurent Koscielny របស់ Arsenal នៅដើមតង់ទី២។
បន្ទាប់ពីការប្រកួតបីជុំ Dortmund បានឡើងឈរនៅលើកំពូលតារាងនៃពូល F ដោយសារតែមានគ្រាប់បញ្ចូលទីគ្រាប់ពីក្រុម Arsenal ខណៈNapoli ក៏មាន៦ពិន្ទុដូចពួកគេផងដែរ ក្រោយពីបានផ្តួលក្រុម Marseille ក្នុងលទ្ធផល ២-១នៅប្រទេសបារាំង។
លោក Wenger បានឲ្យដឹងថា លោកមិនបានឃើញពីហេតុការណ៍នៃការប្រើកែងឲ្យបានច្បាស់គ្រប់គ្រាន់ ក្នុងការបកស្រាយឡើយ ប៉ុន្តែ ទោះបីជាយ៉ាងណា លោកបានទទួលស្គាល់ថា ក្រុមរបស់លោកមិនបានស្ថិតក្នុងទម្រង់លេងដ៏ល្អបំផុតរបស់ពួកគេ ឡើយ។
លោកបានបញ្ជាក់ឲ្យដឹងថា៖ «យើងត្រូវតែសម្លឹងមើលលើខ្លួនយើងផ្ទាល់ទៅលើការមិនមានភាព ចាស់ទុំគ្រប់គ្រាន់ក្នុងស្ថានភាពដូចនោះ។ ប្រសិនបើអ្នកមិនអាចទទួលជ័យជម្នះការប្រកួតនេះទេនោះ អ្នកមិនគួរចាញ់ឡើយ»។
ដោយឡែកលោក Jurgen Klopp គ្រូបង្វឹករបស់ Dortmund ដែលបានទស្សនាការប្រកួតពីកៅអីរបស់អ្នកទស្សនា ក្រោយពីលោកត្រូវបំពេញការពិន័យព្យួរមួយនោះ ពិតជារីករាយណាស់ជាមួយនឹងលទ្ធផលនេះ និងបាននិយាយកំប្លែងពីការបំបាក់មុខនាថ្ងៃខួបកំណើតរបស់លោក Wengerទៀតផង។ លោកបាននិយាយថា៖«ខ្ញុំពិតជាសោកស្តាយអំពីលទ្ធផលនេះ។ នោះគឺជាបញ្ហាមួយរបស់កាលបរិច្ឆេទ។ ខ្ញុំមានថ្ងៃខួបកំណើតនៅខែមិថុនា ដែលនៅពេលនោះមិនមានការប្រកួតអ្វីឡើយ។ ខ្ញុំតែងតែស្ថិតក្នុងថ្ងៃវិស្សមកាល»។
ចំណែកChelsea ដែលជាគូប្រជែងក្នុងអង់គ្លេសរបស់ Arsenal បានជួបជោគវាសនាល្អប្រសើរជាងនៅពេលជួបជាមួយនឹងក្រុមរបស់ អាល្លឺម៉ង់ ខណៈគ្រាប់បាល់ស៊ុតបញ្ចូលទី២គ្រាប់ពី Torres ដែលធ្វើឲ្យគ្រាប់បាល់សរុបរបស់កើនដល់៣៩គ្រាប់សម្រាប់ក្លិបនៅ ទីក្រុងឡុងដ៍មួយនេះ និង១គ្រាប់ពី Eden Hazard បានជួយឲ្យពួកគេទទួលជ័យជម្នះ ៣-០ និងជួយឲ្យពួកគេយកការបរាជ័យថ្ងៃបើកឆាកនៃយុទ្ធនាការមកទម្លាក់លើ ក្រុម Schalke 04 ក្នុងពូល E។
ទាំងក្រុម Chelsea និង Schalke សុទ្ធសឹងមាន៦ពិន្ទុដូចគ្នា ខណៈ Basel ដែលបានផ្តួលក្រុម Chelsea ទាំងមិននឹកស្មានដល់ក្នុងការប្រកួតទី១របស់ពួកគេនោះ មាន៤ពិន្ទុ ក្រោយពីបានបញ្ចប់ក្នុងលទ្ធផលស្មើ ១-១ ពេលជួបក្រុម Steaua Bucharest ក្នុងប្រទេសរូម៉ានី។
ក្រុម Steaua បានរកគ្រាប់បាល់តាមស្មើវិញនៅជិតបញ្ចប់ការប្រកួត ប៉ុន្តែ បច្ចុប្បន្ន ពួកគេកំពុងតែស្ថិតក្នុងកំណត់ត្រានៃការមិនស្គាល់ឈ្នះសោះក្នុង ចំណោម១២ប្រកួតលើទឹកដីខ្លួនឯងនៅក្នុងយុទ្ធនាការមួយនេះ៕ IS
Link to: http://postkhmer.com/index.php/sport/foot-ball/105582-wenger-torres-
No comments:
Post a Comment